समर फेसनको समय

महशुर फेसन डिजानइनरहरुले भनेका छन्–ग्ल्यामर क्षेत्रमा फेसनको ठूलो अर्थ हुन्छ । 

चर्चित फेसन डिजाइनर राल्फ लाउरेनले भनेका छन्,‘म लुगाहरुको डिजाइन गर्दिन, म सपनाहरुको डिजाइन गर्छु । लुगाको सौख भनेको सपनाहरुको प्रयोग हो ।’ फेसन युवायुवतीको उमेरको चाहना र सौखमात्र होइन, सपना पनि हो । त्यसैले त मौसमअनुसार सहर रंगिन र आकर्षक देखिन सुरु भइसकेको छ । गर्मीको पारो उकालो लाग्दैगर्दा, कपडाचाँही शरिरबाट ओरालो लाग्छन् । सहरमा देखिन थालेको दृश्य समर चढिसकेको संकेत हो । 

फेसन समयअनुसारको लगाई र तरिकामात्र होइन, फेसन सपना हो । ग्ल्यामर क्षेत्रमा होमिएकाहरुको सपना सहरमा भित्रिएका, विश्वमा देखिएका नयाँ फेसनसँग नजिक रहनु र त्यसलाई उपयोग गर्नु हो । ‘ग्ल्यामर फिल्डमा खोजी नयाँ फेसनको हुने गरेको छ । र, यो मौसमअनुसार नै परिवर्तन भइरहन्छ ।’, मोडेल अभिरुचि बुढाथोकी भन्छिन्,‘समर फेसनको मजा नै वेग्लै हुन्छ ।’ खासगरी समर फेसन लोकेशनअनुसारको हुने उनको मान्यता छ । थप्छिन्,‘ठाउँ हेरेर हुन्छ, दिउँसो के लगाउने ? पार्टीमा जाँदा कस्तोमा जाने ? अनि अन्य विशेष कार्यक्रममा कस्तो देखिने ।’ अस्पतालमा जागिरेसमेत रहेकी उनी फेसनेवल देखिन समरमा सारी ज्यादा लगाउने गर्छिन् । भन्छिन्,‘यो सदाबहार देखिन्छ, अनि फेसनेवल पनि देखिन्छ ।’ 

नयाँ पहिरनको सृजना मौसमअनुसार नयां ढंगबाट हुने गरेका छन् । त्यसको प्रयोगले पनि व्यापकता पाउने गरेको छ । फेसन पहिरन लगाउनका लागिमात्र होइन, त्यसको प्रभावका लागि पनि हुने गरेको छ । अमेरिकी मोडेल लयलाले भनेकि छिन्,‘आज म ठिक छु, भोली ठिक हुनेछ, अनि पर्सी झनै ठिक देखिनेछु । एक वर्षमा तपाइहरुले मलाई फरक–फरक देख्नुहुनेछ ।’ लयला ग्ल्यामर क्षेत्रमा पहिरनको ठूलो महत्व हुने उल्लेख गर्छिन् । 

यतिबेला नेपाल गर्मीको प्रभावबाट गुज्रिरहेको छ । काठमान्डूदेखि पोखरा र धरानसम्म उत्तिकै गर्मीे छ । मौसमको प्रभाव एकातिर बढिरहँदा स्विमसुटदेखि, वान पिस र टु पीसहरु देखिनु स्वभाविक बनिरहन्छ । पातला टिसर्टहरु स्वभाविक पहिरन बनिसकेका छन् । गर्मी छल्न छोटा र पातला कपडा लगाउनेहरुले आधुनिक फेसनलाई पनि सहज रुपमा उपयोग गरिरहेका छन् । ‘समर फेसनमा पर्ने यस्ता कपडाहरुको विक्रि, बनाउने तरिका चलिरहन्छ ।’ काठमाडौंमा बुटिक सञ्चालन गरिरहेकी कविता आचार्य भन्छिन्,‘गर्मिमा युवतीहरुका फेसनका अनेक डिजाइनहरु आउन थालेका छन्, नयाँ डिजाइनमा पातला कपडाहरुको डिमान्ड बढिरहेको छ ।’ उनी जेन्टल सेक्सी देखिनेहरु भने सारीको प्रयोग ज्यादा गर्ने बताउँछिन् । ‘सारी अहिले नेपाली बजारको समर फेसनको नयाँ डिजाइन हुन थालेको छ।’, आचार्यले भन्छिन् ।

फेसन डिजाइनर जोन वेसलेले ‘पहिरनको सवालमा तिमी कहिले पहिलो नहुनु र अन्तिम पनि नहुनु’ भनेजस्तो छैन, समर फेसनको स्थिति । समर सुरु नहुँदै समर फेसनको चल्तीले सहरलाई रंगाइसकेका छन् । ग्ल्यामरलाई सपना बनाउनेहरु पहिरनको सौखलाई समयानुकुल नै देखाउन रुचाउँछन् । गर्मीमा खासगरी युवतीहरु लुज सर्ट लङ डिजाइन, फ्रि बेल्ट टि–सर्ट, किफोन सर्ट, कटन सर्ट गाउनप्रति सामान्यतया आकर्षित हुने गरेका छन् । यो सहरमा अहिले चलेका नयाँ डिजाइन मानिन्छन् । ‘हाफ पाइन्ट, हट पाइन्ट टिसर्ट समर फेसनका कमन क्लोथका रुपमा मानिन्छन् ।’, मोडेल आशा गौतम भन्छिन्,‘त्यो भन्दा स्पेसीफिक प्रोग्राम र ठाउँ हेरेर हुन्छ ।’

समर फेसनका डेस्रअपहरुको डिजाइनमात्र नयाँ हुँदैनन्, ती डिजाइनका रंगहरुले पनि प्रभावित पार्दछन् । स्काई ब्लु, ह्वाइट, पिंक कलरका जुनसुकै प्रकारका ड्रेसहरुको आकर्षणका रुपमा देखिने गरेका छन् । सहरमा नयाँ फेसनको चर्चासँगै लहर चल्नु स्वभाविक भएपनि महशुर लेखक लि मिल्डनले भनेका छन्,‘यदि तपाइले सुन्दर मुस्कान दिनु भएको छ भने मान्छेले तपाइको परम्परागत पहिरनको वास्ता गर्दैनन् ।’ तर, सहरमा अहिले समर फेसनकै चर्चा ज्यादा छ । 

-  हट नेपाल म्यागेजिनबाट