गृह राज्यमन्त्री बन्ने सपना, अपराधीकरण भयो विपना

जसले गरे, न्यायाधीश रणबहादुर बमको हत्या उनको बयानसहित

सिआइबीले न्यायाधीश बम हत्याका मुख्य योजनाकार बाबु थापासहित चार जनालाई अढाई वर्षको अनुसन्धानपछि पक्राउ गरेको छ

तीन वर्षअघि युएन पार्कनजिकै सर्वोच्च अदालतका तत्कालीन न्यायाधीश रणबहादुर बमको हत्या चुरे भावर एकता पार्टीका तत्कालीन उपाध्यक्ष बाबु थापाको योजनामा भएको प्रहरीले दाबी गरेको छ ।
शनिबार पत्रकार सम्मेलन गरी बमको हत्याको कारण चुरेभावर एकता पार्टीको आधिकारिकताबारे भएको अदालती निर्णय रहेको पनि प्रहरीले जनाएको छ । पार्टीका अध्यक्ष केशव मैनालीको पार्टीलाई नै आधिकारिकता दिएपछि थापाको समूहले बमको हत्या गरेको प्रहरीको अनुसन्धानले खुलाएको छ ।
प्रहरीले घटनामा संलग्न ४ जनालाई अनुसन्धान पूरा गरी शुक्रबार पक्राउ गरेको थियो । सर्लाही र जनकपुरबाट सबैलाई पक्राउ गरिएको र अर्का एक सहयोगी साउदी अरब पुगिसकेको अनुसन्धानले खुलाएको छ ।

विनोद ढकाल

सर्लाहीको मिलनचोक ढुंगेखोला–४ का ३८ वर्षका बाबु थापा र हरिवनका नवीन भन्ने प्रेमराज खड्का सर्लाहीबाट पक्राउ परेका हुन् । जनकपुरका दीपक कर्ण र शिव भनिने करण चौधरी जनकपुरबाट पक्राउ गरिएको प्रहरीले जनाएको छ । रामेछापका सञ्जय इस्माइली फरार छन् । उनी साउदी अरब पुगेको प्रहरीले पत्ता लगाएको छ ।
दुई वर्ष ७ महिना लामो अनुसन्धानपछि प्रहरीले घटनाका मुख्य योजनाकारसहित चार जना पक्राउ गरी सार्वजनिक गरेको छ । प्रहरी प्रधानकार्यालयमा शनिबार पक्राउ गरिएका मुख्य योजनाकार थापासहितलाई प्रहरीले पत्रकार सम्मेलन गरी सार्वजनिक गरेको थियो ।
चुरेभावर पार्टीमा अध्यक्ष केशव मैनाली र उपाध्यक्ष थापाबीचको विवाद सुरुमा निर्वाचन आयोगमा पुगेको थियो । आयोगले मैनालीको साटो मेघराज थापा भनिने बाबु थापाको समूहलाई वैधानिकता दिएको थियो ।
त्यसविरुद्ध मैनाली सर्वोच्च अदालतमा गएका थिए । सर्वोच्चमा न्यायाधीश बमको एकल इजलासले थापा समूहलाई वैधानिकता दिने निर्णय कार्यान्वयन नगर्न अन्तरिम आदेश दिएको थियो ।
प्रहरीको केन्द्रीय अनुसन्धान ब्युरो सिआइबी प्रमुख डिआइजी मेहन्त मल्लले भने, ‘गृहराज्यमन्त्री हुनै लागेका बेला फैसलाले आफ्नो राजनीति तीन वर्र्ष सकियो भन्ने भएपछि थापाले हत्याको योजना बनाए ।’
उनले आफ्नो नाम अमर नेपाल राखेर नेपाल जनता स्वतन्त्र स्वाभिमान पार्टी बनाए । ०६७ असोजमा अपहरण तथा शरीर बन्धक मुद्दामा जलेश्वर जेलमा बस्दा थापाको करण चौधरीसँग चिनजान भएको थियो । करण छुटेपछि थापाले उनलाई काठमाडौंमा राखेका थिए । ब्युरो प्रमुख मल्लले अनुसन्धानको सिलसिलेबद्ध जानकारी गराउँदै भने, ‘थापाले करण र भगवान् भन्ने सञ्जय स्माइली मगरसँग मिलेर न्यायाधीश बमको हत्या योजना बनाएको खुल्यो ।’
थापाको बयानअनुसार बमको हत्याका लागि उनले चार थान पेस्तोल र मोटरसाइकल जम्मा पारे । घटना भएको १८ जेठ ०६९ मा थापा,  करण, सञ्जयसँगै प्रेमराज खड्का र दीपक कर्ण कोटेश्वरमा जम्मा भए । उनीहरूमध्ये प्रेमराजबाहेक सबैले पेस्तोल बोकेका थिए । तीनवटा मोटरसाइकलमा रहेका उनीहरूमध्ये भगवान् भन्ने सञ्जय र करण ललितपुरको युएन पार्कतिर गएका थिए भने बाबु एउटा र प्रेम र दीपक अर्को मोटरसाइकलमा न्यायाधीश बमको घरतिर गएका थिए ।
प्रहरीको अनुसन्धानअनुसार ट्याङलाफाँटा कलंकी क्षेत्रबाट बम चढेको गाडीलाई अघि–पछि गर्दै पछ्याउँदै आएको बाबुको समूहले बंगलामुखी मन्दिरमै न्यायाधीशको हत्या गर्ने योजना बनाएको थियो । ‘धेरै घाइते हुने र भाग्न पनि कठिन हुने देखिपछि बाबुले योजना बदले र साथीहरूलाई त्यहीँ बस्न भनेको देखिन्छ,’ डिआइजी मल्लले भने ।
न्यायाधीश मन्दिरबाट निस्किएपछि बाबुको समूह अघि–पछि गर्दै मोटरसाइकलमा आएको थियो । युएन पार्कछेउ आएपछि बाबुले ओभरटेक गरेर न्यायाधीश बमको गाडी रोके । अनुसन्धानका क्रममा थापाले दिएको बयान उल्लेख गर्दै डिआइजी ठकुरीले थपे, ‘न्यायाधीशका सुरक्षाकर्मीमाथि करणले पहिलो फायर गरे । लगत्तै भगवानले गाडीको पछिल्लो सिटमा बसिरहेका न्यायाधीश बममाथि गोली हाने ।
सुरक्षाकर्मी घाइते भएपछि दुवैले बममाथि गोली हाने । बमलाई हानेको गोली सँगै गाडीमा रहेका राम गिरीलाई पनि लाग्यो । घटनाका योजनाकार बाबुले त्यो सबै हेरिरहे ।
‘न्यायाधीशको हत्यापछि उनीहरू बागमती किनारको बाटो सहयोगी नगर पुगे, जहाँ रातो रंगको मोटरसाइकल छाडेर काँडाघारीस्थित बाबुको घरमा पुगेको देखिन्छ,’ प्रहरी अनुसन्धानले देखाएको छ । ६ गोली लागेका न्यायाधीश बमलाई तत्काल नर्भिक अस्पताल लगिएको थियो, तर उनको बाटैमा निधन भइसकेको थियो ।
घटनामा प्रयोग भएको बा४३प ७२०८ नम्बरको मोटरसाइकल चोरीको थियो, जुन सहयोगीनगरबाट बरामद भएको थियो । बाबुको समूहले २० हजारमा किनेको उक्त मोटरसाइकलमा अर्कैको नम्बर प्लेट लगाइएको थियो ।