म तेस्रो विश्वबाट कराइरहेको छु

सरलता कहाँ खोजूँ
पृथ्वीको कुनचाँही भागमा
कुनचाँही विश्वमा खोजूँ म,
कस-कसका मनपेटमा

बस्तुगत छन् सवैतिर
निर्दयी ठोस विचारका अभिमुखीहरु
स्वार्थका परम् पुजारीहरु,
म तेस्रो विश्वबाट कराइरहेछु ।

मसँग यान छैन, दाम छैन
अनि, त्यो कपटी ज्ञान पनि
जसले म संसार जितौं
अनि, महत्वकांक्षा किनौं

फेदीमा छु, हिउँ पग्लने आश छ
नदिहरु बगुन निरन्तर–यो प्यास छ,
क्रेता–विक्रेता अनि उपभोगकर्ताहरुमाझ
म तेस्रो विश्वबाट कराइरहेछु ।

तर, मेरा आवाज विज्ञान होइनन्
मेरा अक्षरहरु बस्तुगत मानिदैनन्
मेरा विचारहरु श्रव्यसामग्री होइनन्
प्रचारात्मक छ, मेरै आँगनमा ।


आँशु नखसाली रुनेहरुलाई सोध
आँशु बगाएर अनुहार धुनेलाई खोज
म अवैज्ञानिक हुँला तर सत्य छु

म तेस्रो विश्वबाट कराइरहेको छु  ।

-विनोद ढकाल
२०६९ साल पुस १४ गते ।