प्रचण्डपक्षमा नेताहरु उर्लिने, घरभित्र बसेर बाबुराम कुर्लिने ?

२२ वर्षसम्म एमाओवादीको नेतृत्व गरेर आरोह र अवरोहको सामना गरेका पुष्पकमल दाहाल प्रचण्डको यात्रा सामान्य छैन । उनका पक्षमा नेताहरु उर्लिनु स्वभाविक बनिसकेको छ । तर, वैचारिक उचाइबाट प्रशाशनिक निकायको कार्यकारी भएपछि पतन भएका बाबुराम भट्टराई अहिले फेरि बोल्न थालेका छन् । उनी घरमा केही पत्रकार बोलाएर प्रचण्डविरुद्ध कुर्लिन थालेका छन् । हुन त कोही पनि गतिलाचाँही होइनन् तर सहरमा चर्चा छ प्रचण्डपक्षमा नेताहरु उर्लिने र घरभित्र बसेर बाबुराम कुर्लिने कुरा । आखिर के भयो ? 

त्यसका लागि पढ्नुहोस्, यो खबर...

५४ जनाको समानुपातिक सुचीमा आफ्ना पक्षका व्यक्ति नपरेको भन्दै नोट अफ डिसेन्ट लेखेका नेताद्वय डा. बाबुराम भट्टराई र नारायणकाजी श्रेष्ठलाई अध्यक्ष पुष्पकमल दाहाल प्रचण्ड पक्षका नेताहरुले ताकत भए पार्टी फुटाउन खुलेआम चुनौति दिएका छन् । 

यस्तो चुनौति बाहिर आएपछि अहिले एमाओवादीभित्र नेतृत्वमै तिव्र टकराव रहेको सार्वजनिक हुन थालेको छ । त्यसो त नोट अफ डिसेन्ट लेखेका दुई नेतालाई प्रचण्डले सुची नसच्चिने भनेपछि अहिले तीन नेताबीचको टकराव तिव्र छ । उक्त विषय अव केन्द्रिय समितिमा छलफल हुने भएको छ । 

विहीबारै नेता भट्टराइले सानेपामा प्रचण्डले आफ्नो असहमतिलाई वेवास्ता गरेको बताएका थिए । उनले भने,‘प्रचण्डले गल्ती सच्याएनन्, यसबाट हामी गम्भिर भएका छौं । यो उनको अर्को गल्ती हो ।’ उनले प्रचण्ड एकपक्षीय रुपमा अघि बढेको बताएका थिए । पार्टीले संविधानसभामा हारेको जिम्मा पनि प्रचण्डले नै लिनुपर्ने उनले बताएका थिए । 

उता, प्रचण्ड नजिकका नेता गोपाल किराँतीले सार्वजनिक मञ्चमै भने,‘५४ जनाको सुची सच्चिँदैन, त्यहि विषयलाई लिएर बाबुराम र नारायणकाजीले पार्टी फुटाउँछन् भने हिम्मत गरुन, म स्वागत गर्नेछु ।’ एमाओवादीभित्र आयोगमा बुझाएको समानुपातिक सुचीको नामका विषयलाई लिएर बढेको विवादका कारण केहीले राजीनामा दिइसकेका छन् भने नेताद्वय बाबुराम र नारायणकाजीले बुधबारै लाजिम्पाट पुगी अध्यक्ष प्रचण्डलाई नोट अफ डिसेन्ट बुझाएका थिए । यसप्रति असन्तुष्ट किराँती थप्छन्,‘सूचि बनाउन बैठकमा नजाने, बाहिस्कार गर्ने अहिले सार्वजनिक भईसकेपछि सूचि सच्याउन सकिंदैन । यसैलाई लिएर पार्टी फुटाए हुन्छ । फुटेरै जानेलाई नजाउ भनेर बाँधेर राख्न सकिदैन ।’

अध्यक्षले तयार पारेको सूचीमा असन्तोष जनाउने प्रयास नै गलत भएको उनको तर्क छ । कुनैपनि हिसावमा प्रचण्डलाई बदनाम गराउनका लागि दुवै नेता लागि परेको उनको ठहर छ । उनले भने,‘

भट्टराई र श्रेष्ठले प्रचण्डको मृत्यूमा आफ्नो जीवन खोज्ने गरेका छन् ।’ अघिल्लो संविधानसभा रहँदा पार्टीभित्रको विवाद मिलाउने बाहनामा संविधान बन्न नसकेको प्रचण्डपक्षका नेताहरुको विश्लेषण छ । अन्तरसंघर्षका नाममा पार्टीमा सकस पैदा गर्ने काम दुवै नेताले गरेको बताउँदै किराँती थप्छन्,‘पार्टी धेरै वर्ष अन्र्तसंघर्षमा रहँदा संविधान बनाउन सकेनौ । अन्र्तसंघर्षको नाममा पार्टीलाई हैरान पार्ने काम पहिला देखिनै हुँदै आएको छ । अब यो सहिन्न ।’

एमाओवादीमा संगठनात्मक समस्या रहेका कारण नै आगामी माघमा संगठनको महाधिवेशन गर्ने निर्णय गरेको थियो । तर, त्यसअघि नै समानुपातिक विवादले आन्तरिक विवाद सतहसम्म छरिएपछि अहिले नेतृत्वमा नै टकराव सुरु भइसकेको छ । ‘समस्याको समाधान अव केन्द्रिय समितिको वैठकबाट हुन्छ, रुपान्तरण र एकताको प्रयास हुनेछ । तर, त्यति गर्दा पनि विभाजनको अवस्था आए, फुटेर जानेलाई राख्न सकिँदैन ।’ किराँतीले भने,‘शान्ति प्रक्रिया र संविधान निर्माणको कार्यलाई अघि बढाउन दर्जन कमजोरी भएपनि जनयूद्धको नेतृत्व गर्दै आएका अध्यक्ष प्रचण्डको नेतृत्व अझै आवश्यक छ ।’ 

बाबुराम र नायराणकाजीको अहिलेको रडाको योजनाबद्ध भएको दावी गर्दै ५४ जनाको सूचि त बहाना मात्रै भएको किराँतीको ठोकुवा छ ।