प्रेस युनियनमा महाधिवेशनको खहरे, पूर्वाध्यक्ष शर्माले किन भने मिनेन्द्रलाई तोरी लाहुरे ?

मन मुटु र धड्कनमा नेपाली कांग्रेस बोक्नेहरुको जमात कति होला र ? तर यस्ता कांग्रेसहरु पनि काठमाडौंमा छन् जो पदका लागि शक्तिको पछि दौडदैनन् । पत्रकारितामा लामो समय टिकेको मात्र होइन, माउ पार्टी फुट्दा पनि कांग्रेसमा आस्था राख्ने पत्रकारहरुको संगठन अथवा कांग्रेसको भ्रातृ संगठन प्रेस युनियनका तत्कालिन अध्यक्ष रहेका मुरारीकुमार शर्मा डगमगाएनन् । पार्टी विभक्त भएपनि युनियन विभक्त भएन, उनले गर्न दिएनन् । तर, यतिवेलाको दृश्य देखेर उनी आफैं छक्क पर्छन् ।

अहिले प्रेस युनियनको महाधिवेशनको खहरे आएको छ । यो खहरे फेरी कतिबेला सुक्ने हो टुंगो छैन । तरपनि खहरेमा झुम्मिने धेरै छन् । यसबीचमा शर्मासँगको संक्षिप्त बुँदा गत कुरा भयो । यसो भने शर्माले । 

–अहिलेको संचारमन्त्री तोरी लाहुरे हुन् । विद्वान तोरी लाहुरे । यस्ताले कसरी पत्रकारको सुरक्षा गर्न सक्छन् ? अहिलेसम्म सञ्चारमन्त्री भएकाहरुको राजनीति मैले राम्रो देखेको छैन । 

–माओवादीलाई पैसा बाँडेर सरकारी जागिरसम्मको व्यवस्था भयो तर प्रजातन्त्रका लागि लडेका, प्रजातन्त्रको पक्षमा वकालत गरेका स्वतन्त्र पत्रकारको अहिलेको अवस्था के छ ? यसमा सञ्चारमन्त्रीको ध्यान जानु पर्छ की पर्दैन ? कुर्सीमा बसेरमात्र हुन्छ ? पत्रकारको उचित व्यवस्थापन उनको काम हो की होइन ? 

–म प्रेस युनियनको चुनावमा अध्यक्षको उम्मेदवारी दिदैछु । त्यसको टिकट लिनका लागि म नेताको घरमा धाउने होइन । कोही नेताले पनि दिने होइन । म देशभरका पत्रकार साथीहरुले दिएको टिकटका आधारमा उठ्नेछु । म स्वतन्त्र पत्रकार हुँ, पार्टीको टिका थाप्ने र नेताको घर धाउनेमा पर्दिन ।

–पत्रकारको सुरक्षा र पेसागत हकहित श्रमजीवि पत्रकार ऐन कार्यान्वयन गराउन नसक्ने संचारमन्त्री तोरी लाहुरे हुन् । यो वा ऊ पार्टीको भनेर हेर्ने कुरो हुँदैन, खास कुरो यथार्थको धरातलमा हुन्छ । 

–म पत्रकार हुँ । प्रजातन्त्रवादी हुँ । नेपाली कांग्रेसको कार्यकर्ता हुँ । कुनै नेताको चम्चा होइन । त्यसकारण म पत्रकारको हकहितका लागि बोलीरहन्छु ।