करोडको विज्ञापन प्रभाव

विनोद ढकाल

आज सहरमा नयाँ रंगबाट
नयाँ ढंगबाट नितम्ब विक्रि हुँदैछ रे,
चर्चा छ, अखबारमा विज्ञापन पनि छ
टिकट भरमार विक्रि भएकै छ रे ।

विदेशबाट झिकाएर, करोडौं लगानी गरेर
मुलुकका तारे होटलमा ल्याइएको नितम्ब
अत्यन्तै आकर्षक छ रे, निम्ता आयो
लौ त्यसको पर्चारपनि गरिदिन प¥यो ।

साँच्चै, त्यो नवसामन्तीहरुको भिँड
नयाँ क्रान्तिकारीहरुको हुलको रौनक
स्वाधिनतावादीले गरेको उद्घाटनपछि
उही वैज्ञापनिक नितम्ब प्रदर्शन भयो ।

जाँडले मस्त भएको काठमाडौं आधारातमा
विदेशी नितम्ब हल्लिएको देखेर होला
उन्माद, उत्तेजक र उफ्राहटमा हाँस्दो छ
रात अत्यन्तै भयानक छ, त्यहि नितम्ब वरिपरि
भोलीपल्ट,
सायद, यी हल्लाहरु करोडौंका हुन्
यी लचकदार चर्चाहरु हज्जारौं तिरेका स्वाद थिए
मदिरा र काँचा पाकेका मासुमा खर्च गर्नुका
अनिगिन्ति खुसीहरुको समीक्षा थियो ।

उही विज्ञापनको असर थियो, सायद
उही खर्चालु पर्चाको प्रभाव थियो
अखबारमा,
उही कार्यक्रम सफलताको बधाई पनि थियो
अर्कातिर थियो,
'मुगुमा खाद्य संकट, कुहिइएका चामल बाँडिए'
खबरशिर्षकमा मेरो नजर अडियो ।