सिंहदरबार गेटमा प्रचण्डसँग नाचेको, 'आइमाई' भनेर राउटेले मन भाँचेको

रेखा थापा, न माओवादी बन्न सकिन्, न आफुलाई केटी भन्न सकिन् 

एमाले नेता माधव नेपाल भाग्यशाली हुनुमा तीन कारण हुनसक्छन् । उनले राउटेलाई सिंहदरबार पनि देखाए, त्यसै बाहिर उनको विरोधमा सभा गर्ने एमाओवादी र त्यसका अध्यक्ष पुष्पकमल दाहाल प्रचण्डको पार्टीलाई हराए । त्यतिमात्र कहाँ हो र नेपाली चलचित्रकी नायिका जो नेपालको सरकार गिराउ आन्दोलन चलिरहेका बेला प्रचण्डसँग कम्मर मर्काउन पुगिन्, उनको पनि मन कुटुक्क भाँच्चिएको अवस्था पक्कै हो । जनताले पत्याए, माधव नेपालचाँही दुई ठाउँबाट जितेर सिंहदरबार छिर्ने लाइसेन्स लिन पक्कामात्र भएनन्, शितलनिवास तिरको ताकमा पनि छन् । उनको कुरा यत्ति गरौं । 

तर, न प्रचण्डसँग नाचेको फाइदा भयो, न जंगलतिर राउटेको गालामा ओठले डामेको काइदा भयो । रेखा थापालाई जता गएपनि साढे सातको दशाजस्तो भइसक्यो । नेपाली फिल्ममा उनको भुमिकाको चर्चामात्र सुरु हुन थालेको छ, अर्को चर्चाका लागि चामलको पोको बोकेर राउटेबस्तीमा छिरेकी रेखालाई राउटेले अझै अत्यासमा पारे । चामलको पोको बस्तीमा छाडी राउटेका मुखियालाई गालामा म्वाई खाने रेखाको राउटेले नै आलोचना गरेर भनिदिए, म्वाई खाने आइमाईले दिएको चामल लिन्नौं । राउटे समाजमा त एकप्रकारको तहल्का नै मच्चिएछ नी, गाँठे । अन्नपूर्ण पोष्टले त त्यसबारेमा समाचार बनाएर छापिदियो । 

फिल्ममा हिरोलाई समाएर म्वाई खाने शैलीमा रेखाले जंगलमा पनि सुटिङस्पोट नै सम्झिएर त्यस्तो आलोचना हुनेगरी के म्वाई खाएको ? सहरमा युवा कम थिए र ? भनी चिया चर्चा गर्नेहरु कम छैनन् ।

 हुन त रेखा सामाजिक काममा लागेकी नायिका हुन् । उनले जस्तो समाजसेवाको मार्ग अरु नायिकाले लिन सकेका छैनन् । बस्ती घुमेर, साना झुण्डलाई सहयोग र मायाको दृष्टि कसले पो राख्न सक्छ र ? नायिकाहरुमा चलेकी करिश्मा मानन्धरले नसोचेको काम गरिरहेकी रेखा थापाको सिकोचाँही यस क्षेत्रमा आइरहेका अरु हिरोइनहरुले गर्न बाँकी छ । कोही सगरमाथामा भरिया भएर पुुगेर आएर के भयो र ? राउटे बस्तीमा गएर छुने हिम्मत छ ? 

तर, यतिधेरै सेवामा लाग्दापनि रेखाले कतैबाट जस पाउन सकेकी छैनन् । विचरा, उनको सफलताको कामना गरौं । मचाँही भलो चहान्छु, अनि तपाइहरु नि ?