नेपाली नेताको यस्तो छ मति, संविधानसभामा प्रेमिका र श्रीमति

शेरबहादुर, खुमबहादुर, राजेन्द्र महतो, राजकिशोर यादव, अनिल झाले आफ्ना श्रीमति पठाए, शरतसिंह भण्डारीले भने प्रेमिका पठाएका छन् । 

संविधानसभा अव पारिवारिक अड्डा बन्दैछ । संविधानभन्दा भ्रष्टाचार बढ्ने शंका ज्यादा छ । 

संविधानसभा जनताको अधिकार लेख्ने थलोका रुपमा भन्दापनि आफ्ना प्यारीको जागिर बनाउँदैछन् नेता । संघर्ष गर्नेलाई छाडेर श्रीमतिको पेटीकोट बनाउने प्रयत्न भइरहेको छ, संविधानसभा । पार्टीका लागि योगदान गर्ने तर अवसर नपाउने महिला कम छैनन् । दलहरुभित्र कार्यकर्ताले तिव्र असन्तुष्टि राख्नुको कारण पनि मौकामा अवसर नदिनु नै हो । क्षेत्रीय हुन् वा ठूला राजनीतिक दलका नेता उनीहरुले मौकामा आफ्नो पार्टीलाई परिवारवादमा हावी बनाउने गरेका प्रमाण देखाइसकेका छन्, संविधानसभामा आफ्ना पत्नीहरु र प्रेमिकालाई लैजाने सिफारिस गरेर । दलहरुमा महिला कार्यकर्ता कम छैनन्, जसले दिनरात दलका लागि काम नगरेका हुन् । तर, संविधान निर्माणजस्तो मौकामा नेताहरु हावी हुँदा संघर्षशील राजनीतिक कार्यकर्ता भने पछाडी नै पारिएका छन् । 

संविधानसभामा दलहरुले समानुपातिक नामावली बुझाउने मिति हिजो सकियो । प्रायः ठूला साना सवै दलहरुले आफ्ना सभासदको नाम सिफारिस गरिसकेका छन् । कतिपय दलका श्रीमान्श्रीमति नै संविधानसभा छिर्दैछन् भने कतिपय प्रत्यक्षतर्फ हारेका र संविधानसभा जान नपाएका नेताका श्रीमतिमात्रै पनि संविधानसभा जाँदैछन् । 

संविधानसभामा ठूलो दल बनेको नेपाली कांग्रेसका वरिष्ठ नेता शेरबहादुर देउवा र प्रभावशाली नेता खुमबहादुर खड्काका श्रीमतिहरु संविधानसभा जाने भएका छन् । देउवापत्नी डा. आरजु देउवा राणा र खुमबहादुरपत्नी शिला खड्का संविधानसभामा पुग्ने भएका छन् । उनीहरुलाई महिला कोटामार्फत संविधानसभा छिराइएको छ । देउवाका जोइपोइ नै भाग्यशालीका रुपमा देखा परेका छन् । अघिल्लो संविधानसभामा पनि दुवैजना सदस्य थिए । ‘नयाँको नाम परेको छैन, श्रीमतिहरुचाँही राखिएका छन् ।’ एक कांग्रेस नेताले भने,‘तर, केन्द्रिय सदस्य सवै परेका छन् ।’ शिलाले भने प्रत्यक्षतर्फको उमेदवारी फिर्ता गरेकी थिइन् र उनलाई खुमबहादुरको दबादमा समानुपातिकको सुचीमा राखिएको थियो । एमाले नेता अमृतकुमार बोहरा र उनकीपत्नी अष्टलक्ष्मी शाक्य समानुपातिकमा संविधानसभा जाने भाग्यशालीका रुपमा देखा परे । सिफारिसमा विवाद भएपनि उनीहरु जोइपोई नै संविधानसभामा पुग्ने भएका छन् । 

उता, निर्वाचनको प्रत्यक्षतर्फ हारेका मधेसवादी दलका नेताहरुले पनि श्रीमतिलाई समानुपातिकबाट संविधानसभा छिराउने भएका छन् । सद्भावना पार्टी अध्यक्ष राजेन्द्र महतो, संघीय सद्भावनाका अनिल झा पनि श्रीमतिलाई संविधानसभा पठाउने नेता हुन् । आफु हारेपनि महतोले श्रीमति शैलकुमारी देवीलाई समानुपातिकमा सिफारिस गरेका छन् । त्यस्तै झाले श्रीमति डिम्पल झालाई समानुपातिकमा राखेका छन् । त्यस्तै मधेसी जनाधिकार फोरम गणतान्त्रिकका अध्यक्ष राजकिशोर यादवले पनि श्रीमति सरिता यादवलाई समानुपातिकमा पठाउने भएका छन् । उनी प्रत्यक्ष निर्वाचनमा सिरहा क्षेत्र नम्बर १ मा पराजित भएका थिए । उता, राष्ट्रिय मधेस समाजवादी दलका अध्यक्ष शरतसिंह भण्डारीले भने आफ्नी प्रेमिकालाई संविधानसभामा समानुपातिक सभासदमा सिफारिस गरेका छन् । उनले निर्जला राउतलाई सिफारिस गरेका छन् ।