प्रचण्डलाई ज्वरो आउँदा समाचार बन्छ, सिटामोल नपाई मर्ने गरिबको छोरोलाई कसले गन्छ ?

नेपाली राजनीतिका बलिया फिगर एमाओवादी अध्यक्ष पुष्पकमल दाहाल प्रचण्डलाई अचानक ज्वरो आयो । सुरक्षा घेरा र स्याहारमा बसेका यी सर्वहारा नेतालाई किन ज्वरो आयो ? पार्टीभित्र र उनको परिवारभित्र ज्वरोको विषय किन रोइधोइको विषय भयो ? अचम्म के छ भने उनलाई ज्वरो आउनु पनि समाचार बन्छ तर सिटामोल नपाएर मरेको आम जनतालाई कसले गन्छ ? अहिले बजारमा आमसाधारणको प्रश्न यस्तो पनि छ । 

बाबुराम भट्टराइले फेसबुके गफ गर्दा अखबारको मुखपृष्ठमा आउँछ सहयोगको अपिल गर्ने पत्रकार पाल्पालीको परिवारलाई कसले पैसा दिन्छ ? यस्ता प्रश्न अहिलेका आम प्रश्न किन बन्न सकिरहेका छैनन् ? प्रचण्डलाई ज्वरो आएको समाचार यस्तो छ । 

प्रचण्डलाई ज्वरो

एकीकृत नेकपा माओवादी अध्यक्ष पुष्पकमल दाहाल प्रचण्डलाई बुधबार ज्वरो आएपछि पूर्वपोलिटब्यूरो सदस्यहरुको बैठक स्थगित भएको छ । बैठक विहीबार दिउँसो १ बजे पुनः बस्ने नेताहरुले जानकारी गराएका छन् ।

‘अध्यक्षलाई सञ्चो नभएकाले बैठक बस्न नसकेको हो, वैठक विहीबार बस्नेछ ।’ एमाओवादी नेता देवेन्द्र पौडेलले भने,‘उहाँ विरामी भएपछि वैठक बस्ने कुरै भएन ।’ बुधबार दिउँसो १ बजे बस्ने बैठकले आगामी दिनमा पार्टी कसरी अघि बढ्ने भन्नेबारे नेताहरुबाट सुझाव संकलन गर्ने तयारी भएको थियो । तर, अचानक प्रचण्ड विरामी भएपछि एमाओवादी वैठक बस्न सकेन । 

पूर्वपोलिटब्यूरो सदस्यबाट सुझाव संकलन गरिसकेपछि केन्द्रीय कमिटीको बैठक बस्ने एमाओवादीको कार्यक्रम छ । साथै समानुपातिक सभासदको नामावली तयार पार्ने काम पनि बैठकले गर्न बाँकीे छ ।

मौसम परिवर्तनसँगै फैलिएका रुघाखोकीको भाइरलबाट प्रचण्ड पनि प्रभावित भएको उनका सहयोगीहरुले बताएका छन् । ‘अध्यक्षलाई सामान्य रुघाखोकीको भाइरल हो, निको हुनेछ ।’ उनका सहयोगीले भने,‘ठूलो र सिकिस्त हुनेगरी केहीपनि भएको छैन ।’ ‘डिकोल्ड’ खानेगरीको ज्वरो आएको केन्द्रिय सदस्य चुडामणि खड्काले बताए ।

भोल्तेयरको कुरो सापटी लिएर फेसबुकमा बाबुरामले के राखेका थिए अनलाइनको जागिर पाकिगयो । हुँदा हुँदा पत्रपत्रिकाको पनि उत्तिकै जागिरको मेलोमेसो भयो यो । हुन त राजनीतिमा गसिप बनाउन माहिर बाबुरामले के सोचेर यस्तो लेख्छन् थाहा छैन । तर, उनको फेसबुक स्ट्याटसको समाचार यस्तो छ । 

मित्रहरुबाट बचाऊ ः भट्टराई 

एकीकृत नेकपा माओवादीका नेता डा. बाबुराम भट्टराइले शत्रुबाट भन्दा पनि मित्रबाट जोगिनुपर्ने आफ्नो धारणा सामाजिक सञ्जाल मार्फत बुधबार सार्वजनिक गरेका छन् । 

भट्टराईले शुक्रबार आफ्नो फेसबुकमार्फत पार्टी वा सरकारको नेतृत्वमा एउटै व्यक्ति दुई कार्यकाल भन्दा बढी बस्नु हुन्न भन्ने धारणा सार्वजनिक गर्दा आलोचना र प्रशंसा दुबै खेप्नु परेको थियो । 

उनको यस धारणाबाट पार्टीमा उनको आलोचना थप बढ्दै गएको छ । यसैसन्दर्भमा भट्टराईले फेरि फेसबुक मार्फत नै दुस्मनबाट आफू बच्न तयार रहेको बताउँदै मित्रहरुबाट बचाऊ भन्दै फ्रान्सेली दार्शनिक भोल्तेयरले भनेका कुरालाई टपक्कै टिपेर राखेका थिए । 

उनले स्ट्याटसमा लेखेका छन्,‘चोरको खुट्टा काट्’ भन्दा चोरले नै खुट्टा थुते झैं मैले समकालीन विश्वको सबभन्दा महत्वपूर्ण वैचारिक–राजनीतिक प्रश्न लोकतन्त्रको युग सुहाउँदो नयाँ मोडेलबारे चलाउन चाहेको सार्वजनिक वहसबारे धेरैले अत्यन्तै सकारात्मक धारणा राखे पनि केही वाम वृत्त भित्रकै महानुभावहरुले भने सैद्धान्तिक वहसको प्रक्रियामाथि नै वन्देज लगाउने धृष्टता गरेको देख्दा कम्युनिष्ट आन्दोलन अन्तराष्टिय रुपमा किन रक्षात्मक बन्न पुगेको रहेछ भन्ने बुझ्न थप मद्दत पुगेको छ ।’

उनले अगाडी लेखेका छन्,‘त्यसैले शायद फ्रान्सेली दार्शनिक भोल्तेयरले भनेका थिए– हे भगवान्, मलाई मेरा मित्रहरुबाट बचाऊ, मेरा दुश्मनहरुको सामना गर्न म आफैं सक्षम छु ।’

उनको स्ट्याटसले पार्टीभित्रैबाट आफुलाई प्रहार भइरहेको भन्ने संकेत गरेको छ । उनको उक्त स्ट्याटसको बुधबार दिनभर सामाजिक सञ्जालमै समर्थन र आलोचना भएको थियो ।